Miðvikudagur í síðustu viku var annasamur hér í skólanum þar sem við fengum heimsókn frá heilsugæslustöðinni á Höfn. Það voru 3 konur sem komu til að þjónusta sveitungana, læknir og 2 hjúkrunarfræðingar og þær afgreiddu viðtöl, flensusprautur, skólaskoðun og fræðslustundir með nemendum. Að þessum degi loknum var komið að haustfríi skólans og við vorum að mæta til leiks á ný í dag eftir langa og góða helgi sem sumir notuðu til ferðalaga og/eða ýmissa kaupstaðarerinda en aðrir notuðu tímann vel heima. Á laugardaginn gekk veturinn í garð þegjandi og hljóðalaust enda mjög gott veður allt haustfríið en kannski minnir hann á sig á morgun þar sem veðurspáin er varhugaverð núna.