Þá er nú þorrinn genginn í garð þó að varla sé nú hægt að merkja það á veðrinu því að það hefur varla komið vetur ennþá. En það getur nú ýmislegt gerst með veðrið á þorra, góu og einmánuði svo að það er best að tala varlega. Við héldum skólaþorrablótið á bóndadag og fór það fram með hefðbundnum hætti með þátttöku sveitunga, bara fjölmennara en nokkurn tíma áður ef við munum rétt, það mættu 78 manns. Þorramaturinn þótti vel heppnaður og eins og venjulega fengum við góða aðstoð úr foreldrahópnum við að framreiða hann, að þessu sinni voru það 2 kokkar frá hótelinu á Hnappavöllum enda eru flest börnin frá þeirra heimilum. Skv. venju var sungið og farið í samkvæmisleiki, og að lokum dansað smástund. Við kunnum öllum gestunum bestu þakkir fyrir þátttökuna.

ummæli